ବାଲକୋନିରୁ ଟିକେ ଛାଡି ପାଖା ପାଖି ଠିଆ ହୋଇଥିବା ସେଇ କୃଷ୍ଣଚୁଡା ଗଛ ଦୁଇଟି ଫୁଲରେ ଲଦି ହୋଇ ପଡିଥିଲେ । ତା’ ପାଖକୁ ଲାଗି ଲାଗି ଅନେକ ଗୁଡିଏ ଗଛ । ବସନ୍ତ ଋତୁ ଆସି ଗଲାଣି ଏ ଭିତରେ । ସବୁଜ ପତ୍ରରେ ଗଛ ସବୁ ଯେ ଏତେ ଆକର୍ଷଣୀୟ ଦିଶନ୍ତି, ବୋଧହୁଏ ବହୁତ ଦିନ ପରେ ଲକ୍ଷ୍ୟ କରୁଥିଲି ମୁଁ । ହଁ, ଗଲା କେତେବର୍ଷ ହେଲାଣି ଅଫିସ କାମର ଚାପରେ ବାଲକୋନିରେ ଠିଆ ହେବାକୁ ସମୟ ପାଇନି, ଆଉ ଏତେ ସମୟ ଏମିତି ମଗ୍ନ ହୋଇ ଗଛ ମାନଙ୍କ ସହ ଏକାତ୍ମ ହେବା କଥା ଚିନ୍ତା କରିଥାନ୍ତି କେମିତି ! ଫର୍ଚ୍ଛା ହୋଇ ଆସୁଥିଲା ଆକାଶ । ଅଜଣା ଭୁତାଣୁଟିକୁ କିଛି ସମୟ ପାଇଁ ଭୁଲି ଯାଇ ସକାଳ କାକରରେ ସଦ୍ୟ ଗାଧୋଇଥିବା ଗଛ ଗୁଡିକ ଉପରେ ଆଖି ପହଁରାଇ ନେଉଥିଲି । ଚାରିଆଡ଼ ଖାଁ ଖାଁ ଲାଗୁଥିଲା । ଗୁମସୁମ ଲାଗୁଥିଲା । ସୁଲୁସୁଲୁ ପବନ ବୋହୁଥିଲା, ଆଉ ପତ୍ର ସବୁ ସେଇ ପବନରେ ଝୁଲୁଥିଲେ ଧିରେ ଧିରେ ।
ନିଜକୁ ପ୍ରକୁତିସ୍ଥ ରଖିବାକୁ ମୁଁ ପ୍ରୟାସ କରୁଥିଲି । ସେଇ ଭୁତାଣୁ ଆସିଥିବାର ଖବର ମତେ ଆଶଙ୍କିତ କରି ରଖିଥିଲା । ଘରୁ ଅଫିସ କାମ କରିବାର ଆଜିକୁ ଅଠର ଦିନ ହୋଇଗଲା । ଅଞ୍ଜଳୀ ପାଖରେ ଥିଲେ ଏତେ ଏକୁଟିଆ ଲାଗୁ ନ ଥାନ୍ତା । ଅଞ୍ଜଳୀ ଥିଲେ ଗହଳ ଚହଳ ଲାଗିରହିଥାଏ ଘରେ । ନିରା ନୂଆ କରି ବାଙ୍ଗାଲୋରରେ ଚାକିରୀ ଆରମ୍ଭ କଲା । ନିରା ପାଖରେ କିଛିଦିନ ରହି ଆବଶ୍ୟକୀୟ ଘରକରଣାରେ ତା’ ଘରଟିକୁ ଚଳିବା ଉପଯୋଗୀ କରେଇ ଦେଇ ଆସିବା ଉଦ୍ଦେଶ୍ୟରେ ପୁରା ପରିବାର ଯାଇଥିଲୁ ବାଙ୍ଗାଲୋର । କରୋନା ନାମକ ଏଇ ନୂଆ ଭୁତାଣୁ ସେତେବେଳେ ଚୀନର ଉହାନ ସହରରେ ତା’ର ତାଣ୍ଡବ ଆରମ୍ଭ କରିଦେଇଥିଲା । ସେତେବେଳେ ସେଇ ଭୟଙ୍କର ଭୁତାଣୁକୁ ନେଇ ମନରେ ତିଳେ ମାତ୍ର ଆଶଙ୍କା ନ ଥିଲା । ସହସ୍ର ସହସ୍ର ଯୋଜନ ଦୂରରେ ଚୀନର ଚିନ୍ତା ଯେ ଦିନେ ହଳା ହଳ ବିଷ ପରି ଗ୍ରାସି ଯିବ ସାରା ବିଶ୍ୱକୁ, ସେ କଥା କେହି କେବେ ବି କଳ୍ପନା କରି ନ ଥିଲେ । ଆମେ ବି ନୁହେଁ । ସବୁ ଠିକ ଠାକ ଚାଲିଥିଲା ବେଳେ କରୋନା ଦେଶରୁ ଦେଶକୁ ଆରମ୍ଭ କଲା ତା’ର ଲୋମହର୍ଷଣ କାରୀ ଯାତ୍ରା । ତାର ପଞ୍ଝାରେ କବଳିତ ହେଲେ ଗୋଟାକ ପରେ ଗୋଟିଏ ଦେଶ । ଠିକ ସେତେବେଳକୁ ଆମେ ପୁରା ପରିବାର ନିରାର ଘର ସଜାଡ଼ିବା ନିଶାରେ । ଅଫିସରୁ ଶୀଘ୍ର କାର୍ଯ୍ୟରେ ଯୋଗ ଦେବାର ଆଦେଶ ପାଇ ମୁଁ ମୁମ୍ବାଇ ଫେରିଆସିଲି ଆଉ ଅଞ୍ଜଳୀ ସପ୍ତହଟେ ପାଇଁ ଚାଲିଗଲେ ଓଡିଶା । କରୋନା ବଡ଼ବଡ଼ ବିଦେଶୀ ରାଷ୍ଟ୍ରରେ ପହଞ୍ଚି ଗଲାଣି ଜାଣି ମଧ୍ୟ ଆଶଙ୍କା ଆସି ନ ଥିଲା ମନରେ । ବିଳାସମୟ ରାଷ୍ଟ୍ରର ଏ ସବୁ ବିଳାସୀ ରୋଗ କହି ତାତ୍ସଲ୍ୟ କରିଥିଲି ସେଦିନ ପ୍ରକାଶ୍ୟରେ । ଅଞ୍ଜଳୀଙ୍କୁ କହିଥିଲି, ଓଡିଶା ଯାଉଛ, ପ୍ରବୋଧ ବାବୁଙ୍କ ସହ କଥା ହୋଇ ନିରାର ନିର୍ବନ୍ଧ ତାରିଖ ବି ଠିକ କରିଦେବ । ଅଞ୍ଜଳୀ ଏଥର ଏକା ଏକା ମୋ ବାପାବୋଉଙ୍କ ପାଖରେ ରହିବେ । ଅଞ୍ଜଳୀ ଯାଉଛନ୍ତି ଖବର ପାଇ ଭାଇଭାଉଜ ବି ଆଖପାଖ ବୁଲିଯିବା ପାଇଁ ଆଶା ବାନ୍ଧିଲେଣି । ‘ସତରେ, ବାପାବୋଉଙ୍କୁ ଏକା ଛାଡି ତୁମ ଭାଇ ଭାଉଜ ବି କୁଆଡେ ଯାଇପାରୁନାହାନ୍ତି’ – ଏକଥା କହିଲାବେଳେ ଏଥର ଅଞ୍ଜଳୀଙ୍କ ସ୍ୱରରେ କୃତିମତା ଲକ୍ଷ୍ୟ କରି ପାରି ନ ଥିଲି ।
ନିରା ଚାକିରୀ ପାଇଛି । ଭଲ ଜାଗାରେ ତାର ବାହାଘର ବି ଠିକ ହୋଇଛି । ଅଞ୍ଜଳୀ ଏତେ ସବୁ ଖୁସି ଭିତରେ ଉବୁଟୁବୁ ହେଉଥିଲେ ଯେ ବାପାବୋଉଙ୍କ ସହ ଗାଁରେ ରହିବା କଥାଟା ସହଜରେ ଗ୍ରହଣ କରି ନେଇଥିଲେ । ‘ତୁମ ଭାଇ ଭାଉଜ ବି ବୁଲାବୁଲି କରି ଆସନ୍ତୁ । ମୁଁ ତ ବାପାବୋଉଙ୍କ ପାଖରେ ରହିବି ଚାରିଦିନ ।’ ସପ୍ତାହର ଶେଷ ତିନିଦିନ ଭୁବନେଶ୍ୱର ଆସି ସାଙ୍ଗ ମାନଙ୍କ ସହ ମଜା କରିବା ପାଇଁ ସବୁ ପ୍ରକାର ପ୍ରସ୍ତୁତି କରିସାରିଲେଣି ଅଞ୍ଜଳୀ । କାହିଁକି କେଜାଣି ବାହାଘରର ପଚିଶ ବର୍ଷ ପରେ ବି ବାପାବୋଉଙ୍କ ସହ ଗାଁରେ ରହିବାରେ ଅଞ୍ଜଳୀ ଆଦୌ ସହଜ ନୁହଁନ୍ତି । ବାପାଙ୍କର ଚାକିରୀ ଥିଲାବେଳେ ସେଇ ଛୋଟ ସହରରେ ଛୋଟ ଘରଟିକୁ ଯିବା ପାଇଁ ତାଙ୍କର ଆପତ୍ତି ନଥିଲା କିନ୍ତୁ ଚାକିରୀ ପରେ ବାପାବୋଉ ଗାଁରେ ରହିବାକୁ ନେଇ ଘୋର ଆପତ୍ତି କରିଥିଲେ ଅଞ୍ଜଳୀ । ବାପାବୋଉ ବି ନଛୋଡବନ୍ଧା । ବଡ ଭାଇ ସେଇ ପାଖ ଗାଁ ସ୍କୁଲରେ ଶିକ୍ଷକତା କରୁଥିଲେ । ଭାଉଜ ସେଇ ଗାଁର ଝିଅ । ତେଣୁ ସେମାନଙ୍କର ସମ୍ମତ୍ତି ଥିଲା ବାପାବୋଉଙ୍କ ନିଷ୍ପତ୍ତିରେ । ଆଉ ମୁହଁ ଖୋଲି ନାହାନ୍ତି ଅଞ୍ଜଳୀ । ଦିନେ ଦୁଇ ଦିନ ଗାଁରେ ବୁଲି ଆସିବାକୁ ଜଞ୍ଜାଳ ଭାବି ନାହାନ୍ତି କେବେ, ଗୋଟିଏ ସର୍ତ୍ତରେ । ମୋ ସହ ଯିବେ ପୁଣି ମୋ ସହ ଫେରିଆସିବେ ଗାଁରୁ । ଏମିତି ଚାଲିଗଲାଣି ଗୁଡ଼ାଏ ବର୍ଷ । କଥାଟି ବି ଆଦୌ ଅସ୍ୱାଭାବିକ ଲାଗିନି କେବେ ।
ଅଳ୍ପ ସମୟ ଭିତରେ ସବୁକିଛି ଏପଟ ସେପଟ ହୋଇଗଲା । ମୁଁ ମୁମ୍ବାଇରେ ଅଫିସରେ ଯୋଗ ଦେଲି, ଆଉ ନିରା ବାଙ୍ଗାଲୋରରେ ତା’ ଚାକିରୀରେ । ଅଞ୍ଜଳୀ ଭୁବନେଶ୍ୱରର ଅନତିଦୂରରେ ଆମ ଗାଁ ବିଶ୍ୱନାଥ ପୁରରେ । କ୍ୟାଲେଣ୍ଡରର ପୃଷ୍ଠା ଟିଏ ଓଲଟି ଗଲା । ଆଉ ତା ସହିତ ଓଲଟି ଗଲା ଆମ ତିନିଜଣଙ୍କ ଭାଗ୍ୟ । କେମିତି କେଜାଣି, ସେ ଭୟଙ୍କର ଭୁତାଣୁ ଆମ ଭାରତରେ ଆସି ପହଁଚିଗଲା ।
ସତେ କ’ଣ ଯୁଦ୍ଧ ଆରମ୍ଭ ହୋଇଗଲା ! ଆତଙ୍କ ଖେଳିଗଲା ଚାରିଆଡ଼ । ସରକାର ଲକଡାଉନ ଘୋଷଣା କଲେ । ଅଦୃଶ୍ୟ ଭୂତାଣୁକୁ ପରାଜୟ କରିବାର ଏକମାତ୍ର ଉପାୟ ଗୃହବନ୍ଦୀ ହୋଇ ରହିବା । ସମସ୍ତଙ୍କୁ ଘରେ ଏକାନ୍ତବାସ କରିବାକୁ ହେବ । ଶେଷ ବିମାନଟିରେ ଟିକେଟ କରିଦେବାକୁ ସେଦିନ ବାରମ୍ବାର ଫୋନ କରିଥିଲେ ଅଞ୍ଜଳୀ । କେଜାଣି କାହିଁକି ମନ ମାନି ନ ଥିଲା । ‘କିଛି ହେବନି । ରହିଯାଅ ଆଉ କିଛି ଦିନ । ସବୁ ଠିକ ହୋଇଯିବ‘ – ସେଦିନ କହିଥିଲି । ପ୍ରଥମ ଥର ପାଇଁ ଅଞ୍ଜଳୀ ଜିଦ କରି ନ ଥିଲେ, ଯେମିତି ସେ ଛୋଟ ଛୋଟ କଥାରେ କରନ୍ତି । ଦୁଇ ତିନି ଥର ଫୋନ କରି ଖାଲି ଅନୁରୋଧ କରିଥିଲେ ମତେ । ଆଦୌ ଅସ୍ଵାଭାବିକ ଲାଗି ନ ଥିଲା କିଛି । ଦିନେ ଦୁଇଦିନ ଭିତରେ ବଦଳିଗଲା ସବୁକିଛି । ଭୟଙ୍କର ସେଇ କରୋନା ଭୁତାଣୁର ପଞ୍ଝା ଭିତରେ ପଶି ସାରିଥିଲେ ପୁରା ବିଶ୍ୱର କୋଟି କୋଟି ଜନତା । ମୁଁ, ମୋ ସ୍ତ୍ରୀ ଅଞ୍ଜଳୀ ଆଉ ମୋ ଝିଅ ନିରା ପ୍ରଥମଥର ପାଇଁ ପରସ୍ପରଠାରୁ ଅଲଗା ହୋଇ ତିନୋଟି କୋଣକୁ ଛିଟିକି ପଡ଼ିଥିଲୁ ।
ଅଞ୍ଜଳୀ, ମୁଁ ଓ ନିରା ତିନିଜଣ ଏବେ ତିନୋଟି ରାଜ୍ୟରେ । ଲକଡାଉନ ଆହୁରି ଏକୋଇଶ ଦିନ ବଢ଼େଇ ଦିଆଯାଇଛି । ଅଞ୍ଜଳୀଙ୍କର ଗାଁରେ ରହିବାର ଅଠର ଦିନ ହୋଇଗଲା । ଗାଁରେ ପହଂଚିବା ଦିନ ସେ ଖୁସି ଥିଲେ । ‘ବୋଉ ପୋହଳା ମାଛ ଅଣେଇଛନ୍ତି । ମତେ ଚୁନା ମାଛ ଚୁର୍ଚୁରା ଭଲ ଲାଗେ କହିଥିଲି ବୋଲି ସେ ଚୁନା ମାଛ ବି ମଗେଇଛନ୍ତି’ କହିଲା ବେଳେ ଅଞ୍ଜଳୀଙ୍କ ସ୍ୱରରୁ ଖୁସି ଝଲସୁଥିଲା । ଚୁନା ମାଛ ଅଞ୍ଜଳୀଙ୍କୁ ନୁହେଁ, ମତେ ଭଲ ଲାଗେ । କେବେ କେମିତି ବଜାରରୁ ଲୋଭରେ ନେଇଆସେ ମୁଁ । ଅଞ୍ଜଳୀ ଭାରି ବିରକ୍ତ ହୁଅନ୍ତି । ‘କିଏ କରିବ ଏତେ କାମ । ଆକୁ ବାଛିବା କଣ ସହଜ ହୋଇଛି । ଘଣ୍ଟାଏ ଲାଗିବ ଏଇଲେ । ଘରଟା ଯାକର କାମ ପଡିଛି କିଏ କରିବ ???’ । ଆଉ କେବେ ଆଣିବିନି କହି ମନଟାକୁ ପ୍ରବୋଧନା ଦେଇ ନିଜେ ଅନଭ୍ୟସ୍ତ ହାତରେ ଲଟପଟ ହୋଇ କେଳେଇଛି କେତେ ଥର । ଆଜି ମୋ ବୋଉ ପାଖରେ ଚୂନା ମାଛ । ବୋଉ କେଳେଇ କାଳେଇ କେତେ ସୁଆଦିଆ କରି ରାନ୍ଧିଦେଵ ଚୁନାମାଛ ବେସର । ଆଃ, ଲାଳ ଗଡ଼ିଆସିଥିଲା ପାଟିରୁ । ସେଦିନ ରାତିରେ ଶୋଇଲା ଶେଜରୁ ଆଉଥରେ ଫୋନ କରିଥିଲେ ଅଞ୍ଜଳୀ – ପ୍ରବୋଧ ବାବୁଙ୍କୁ ଫୋନ କରି ନିର୍ବନ୍ଧ ତାରିଖ ଠିକ କରିବାକୁ କହିଦେଇଛନ୍ତି । ଅଞ୍ଜଳୀ ଭାରି ଦାୟୀତ୍ୱସଂପନ୍ନା ଲାଗୁଥିଲେ । ଖୁସି ଲାଗୁଥିଲେ । ପୁଣିଥରେ ସୁଆଦିଆ ମାଛ ତରକାରୀ କଥା ଶୁଣାଇ ପ୍ରଲୋଭିତ କଲେ ମତେ । ତା’ପରେ ସେ ତ ଶୋଇଗଲେ, ଡେରି ରାତିରେ ମ୍ୟାଗି ପ୍ୟାକେଟ ଟିଏ ସିଝେଇ ଖାଇଦେଇ ବୋଉ ହାତ ରନ୍ଧା କେତେନା କେତେ ସୁଆଦିଆ ରାନ୍ଧଣାକୁ ଝୁରି ଝୁରି ମୁଁ ଶୋଇ ପଡ଼ିବାକୁ ଚେଷ୍ଟା କରୁଥିଲି ।
ତା’ପର ଦିନ ହିଁ ସବୁ ଗଡ଼ବଡ଼ ହୋଇଗଲା । ଚଳଚଞ୍ଚଳ ପୃଥିବୀର ସବୁ ରାସ୍ତା ଉପରେ ଖଡ୍ଗ ହସ୍ତରେ ଠିଆ ହୋଇଗଲା କରୋନା । ସେଇ ଭୟଙ୍କର ଭୁତାଣୁ । ଏଥର ନିଜକୁ ଲୁଚେଇବାର ସମୟ । ଦେଶ ବିଦେଶର ସମସ୍ତେ ନିଜକୁ ସେଇ ସର୍ବଗ୍ରାସୀ ଭୁତାଣୁ କବଳରୁ ରକ୍ଷା କରିବା ଚେଷ୍ଟାରେ ଲାଗି ପଡିଲେ । ସେଇ ଦିନ ତିନି ଥର ଫୋନ କରିଥିଲେ ଅଞ୍ଜଳୀ, ଶେଷ ବିମାନରେ ଟିକେଟ କରି ପଠେଇବା ପାଇଁ କହିଥିଲେ । ବୋଧହୁଏ ନିୟତିର ନିର୍ଦ୍ଦେଶ ଅନ୍ୟକିଛି ଥିଲା । ସବୁବେଳେ ଅଞ୍ଜଳୀଙ୍କ ନିର୍ଦ୍ଦେଶରେ ଚାଲୁଥିବା ସତ୍ତ୍ୱେ ଏଥର ମୁଁ ମୋ ନିଷ୍ପତ୍ତି ଶୁଣାଇଦେଲି, କହିଲି ‘କିଛି ହେବନି । ରହିଯାଅ ଆଉ କିଛି ଦିନ । ସବୁ ଠିକ ହୋଇଗଲେ ଆସିବ’ । ଅଞ୍ଜଳୀ କେମିତି ମାନି ନେଲେ ମୋ ନିଷ୍ପତ୍ତି । ବାସ, ତା’ପର ଠାରୁ କେବଳ ମୁଁ ଫୋନ କରିଛି ଗାଁକୁ । ପ୍ରତିଦିନ । ଅଞ୍ଜଳୀ ଫୋନ ଉଠାନ୍ତି । ସ୍ୱାଭାବିକ ଭାବରେ କଥା ହୁଅନ୍ତି । ଫୋନ କାଟିଦେଲା ପରେ ବି ବେଶ୍ କିଛି ସମୟ ଅନ୍ୟମନସ୍କ ରହେ ମୁଁ । ନିଜକୁ ବୁଝାଏ, ସ୍ଥିର ହୁଏ । ଅଫିସ କାମରେ ମନ ଦିଏ । କାମର ଜଞ୍ଜାଳରେ ବୁଡିଯାଏ, ଆଉ କିଛି ବି ମନେପକେଇ ପାରେନା ।
ଅଞ୍ଜଳୀ ଗାଁରେ । ବାପାବୋଉଙ୍କ ପାଖରେ । ମୋ ବାପା; ଖୁବ କମ କଥା କୁହନ୍ତି । ଅଳ୍ପ କିଛି ସାଙ୍ଗ ଅଛନ୍ତି ତାଙ୍କର । ସେମାନେ ସବୁଦିନ ସନ୍ଧ୍ୟାରେ ଏକାଠି ହୁଅନ୍ତି । ସୁଖଦୁଃଖ ହୁଅନ୍ତି । ବୋଧହୁଏ ସେଇ କେତେଜଣ ସାଙ୍ଗ ବୁଝିପାରନ୍ତି ମୋ ବାପାଙ୍କୁ । ବାପା ବି ସେଇ କେତେଜଣଙ୍କ ସହ ଭାରି ସହଜ ଭାବରେ ମିଶନ୍ତି । ଥରେ ବାପା ମୋତେ କହିଥିଲେ ଗୋଟେ ନିର୍ଦ୍ଦିଷ୍ଟ ବୟସ ପରେ ଅଳ୍ପ କେତେଜଣ ବନ୍ଧୁ ହିଁ ପାଖରେ ଠିଆ ହୁଅନ୍ତି । ବହୁତ ଜଣଙ୍କ ସହ ନିଜକୁ ସାମିଲ କରି ରଖିବା ସମସ୍ତଙ୍କ ପକ୍ଷେ ସମ୍ଭବପର ହୁଏନି । ହୁଏତ ବାପାଙ୍କର ସେମିତି କିଛି ଅଭିଜ୍ଞତା ହୋଇଥିଲା । ବାପା ସହଜ କରି ନେଇଥିଲେ ତାଙ୍କ ଜୀବନକୁ । ଖୁବ ଶୃଙ୍ଖଳିତ ହୋଇଯାଇଥିଲା ତାଙ୍କ ଜୀବନ । ଅଞ୍ଜଳୀ ଖୁବ ସଂଭ୍ରମତାର ସହ କଥା ହୁଅନ୍ତି ତାଙ୍କ ସହ । ଅଞ୍ଜଳୀଙ୍କୁ ବାପା ଭଲ ପାଆନ୍ତି । ସମ୍ମାନ କରନ୍ତି । ଏବେ ଏଇ ଲକଡାଉନରେ ବାପା ଏକା ହୋଇ ଯାଉଥିବେ । ବାପାଙ୍କର ସେଇ ଅଳ୍ପ କେଇଜଣ ସାଙ୍ଗ କ’ଣ ବାପାଙ୍କୁ ସଖ୍ୟ ଦେଇ ପାରୁଥିବେ । ବୋଧହୁଏ ସେ ସମସ୍ତେ ବାପାଙ୍କ ପରି ସ୍ଵଳ୍ପଭାଷୀ ହୋଇଥିବେ । ବେଳେବେଳେ ଇଚ୍ଛା ହୁଏ ଅଞ୍ଜଳୀଙ୍କୁ ଫୋନ କରି ବାପାଙ୍କ ସହ ବେଶୀ ସମୟ କଟେଇବା ପାଇଁ କହିବି । କହିପାରେନି । ବିଗତ ପଚିଶ ବର୍ଷ ଭିତରେ କେବେବି ଅଞ୍ଜଳୀଙ୍କୁ ବାପାଙ୍କ ସହ ମନଖୋଲି କଥା ହେବାର ଦେଖିନି । ଆଜି ଏତେ ବର୍ଷ ପରେ … ନିଜକୁ ବୁଝେଇ ନିଏ । ବୋଉ ଠିକ୍ ଥିବ । ଅଞ୍ଜଳୀଙ୍କ ସଂଗେ ତାର ସମୟ କଟି ଯାଉଥିବ । ଅଞ୍ଜଳୀଙ୍କପ୍ରତି ତା’ର ଅସନ୍ତୁଷ୍ଟତା ସିଏ ପ୍ରକାଶ କରି ଦେଉ ନଥିବତ !! ଅଞ୍ଜଳୀ କ’ଣ କ୍ଷମା କରିଦେଉଥିବେ ତାକୁ !!!! କେତେ କଣ ଭାବିହୁଏ ମୁଁ ।
ଅଞ୍ଜଳୀଙ୍କ ବିନା ଖାଲି ଖାଲି ଲାଗେ ଜୀବନ । ଖାଁ ଖାଁ ଗୋଡାଏ ମୋ ଏକୁଟିଆ ଘର । ଘର କାମରେ ସାହାଯ୍ୟ କରୁଥିବା ସ୍ତ୍ରୀ ଲୋକଟି କାମ କରିବାକୁ ଆସେନି । ଘର ଓଳା ନ ହୋଇ ରହିଯାଏ । କଂଚା ଦରସିଝା କିଛି ରୋଷେଇ କରି ଖାଇନିଏ ମୁଁ । ନିରାର ଖବର ଅଞ୍ଜଳୀଙ୍କ ଠାରୁ ବୁଝେ । ନିରା ମତେ ଫୋନ କରେ । ନିଜ କଥା ବିଶେଷ କିଛି ନ କହି ମୋ’ ଖବର ବେଶୀ ବୁଝେ । ମାଆ ପରି ଉପଦେଶ ଦିଏ । ମୁଁ କିନ୍ତୁ ତାକୁ କହିପାରେନି କିଛି । ଏ ଲକଡାଉନରେ ତାକୁ ଅଫିସ ଯିବାକୁ ପଡୁନି । ସେ ବି ମୋ ପରି ଘରୁ କାମ କରୁଛି । ନୂଆକରି ଆରମ୍ଭ କରିବାକୁ ଯାଉଥିଲା ଚାକିରୀ । ହାତ ଗଣତି ଦିନ କେତୋଟି ଅଫିସ ଯାଇଛି ସେ । କାମ ଶିଖିବା ଆଗରୁ ଘରୁ କାମ କରିବା ଆରମ୍ଭ ହୋଇଗଲା । ଦୁଃଖୀ ହୋଇଯାଇଥିଲା ନିରା । ଉତ୍ସାହୀ ମନଟି ତା’ର ଭାଙ୍ଗି ପଡୁଥିଲା । ଏ ବିଶ୍ୱ ମହାମାରୀକୁ ସାରା ପୃଥିବୀକୁ ସାମ୍ନା କରିବାକୁ ହେବ । ସାହସର ସହିତ, ଧୈର୍ଯ୍ୟ ଧରିବାକୁ ହେବ ଗୋଟେ ଲମ୍ବା ସମୟ ପାଇଁ । ସଜାଡି ହୋଇଯିବ ସବୁକିଛି । ନିରାକୁ ନେଇ ମୋ ମନର ଅବସାଦକୁ ମୁଁ ତା’ ସହିତ ବାଣ୍ଟି ନେବା ପୂର୍ବରୁ ସେ ମତେ ନେଇ ତାର ବ୍ୟସ୍ତତା ଜାହିର କରେ । ବୁଝାଏ ତାକୁ । ଖାଇଛି ମୁଁ । ଠିକ ଅଛି । ଅଞ୍ଜଳୀ ବିନା ମୋ’ ଇତଃସ୍ତତଃ ଜୀବନ ନିରା ଆଖି ଆଗରେ ଖୋଲି ହୋଇଯାଉଥିବା ବେଳେ ମୁଁ ତା’ ଉପରେ ପରଦା ଟାଣି ନେବାକୁ ଚେଷ୍ଟା କରେ । ଆମେ ତିନିହେଁ ତିନି ଜାଗାରେ ପରସ୍ପର ପାଇଁ ଘାରିହେଉ ।
ବାଲକୋନିରେ ଠିଆ ହୋଇ ଆଜି ଅନେକ ଦିନ ପରେ ମୁଁ ପ୍ରକୃତିକୁ ଦେଖୁଥିଲି । ପଛରେ ଛାଡି ଆସିଥିବା ଦିନ ଗୁଡିକୁ ଆଉଥରେ ଜୀଇଁବାର ସୁଯୋଗ ମିଳନ୍ତାକି ?? ମନ ଭରି ଦେଖନ୍ତି ପ୍ରକୃତିର ଏ ଅପାଶୋରା ସୌନ୍ଦର୍ଯ୍ୟକୁ । ଫେରି ପାରନ୍ତି କି ସେଇ ସମୟକୁ । ଅଣଦେଖା କରିଥିବା ଅତୀତକୁ ଝୁରି ହେଉଥିଲି ମନେମନେ । ଶବ୍ଦ କରି ବାଜି ଉଠିଲା ମୋ’ ହାତରେ ମୋବାଇଲ ଫୋନଟା । ଆଜି ଅନେକ ଦିନ ପରେ ଅଞ୍ଜଳୀ ଫୋନ କରିଥିଲେ । ସଂଗେ ସଂଗେ ଉଠେଇଲି ଫୋନ । ଫୋନ ଆରପଟୁ ଅଞ୍ଜଳୀଙ୍କ କାନ୍ଦକାନ୍ଦ ସ୍ୱର ଶୁଣିପାରୁଥିଲି । ସାମାନ୍ୟ ବିବ୍ରତ ଅନୁଭବ କଲି । ମୁଁ ଫୋନ ଉଠାଇବା ମାତ୍ରେ ସେ କିନ୍ତୁ ହସିଦେଲେ । କହିଲେ ବୋଉ ମୋ ଉପରେ ଭୀଷଣ ଅସନ୍ତୁଷ୍ଟ । ଠିକ ଏଇକଥା ଶୁଣିବି ବୋଲି ମୁଁ ଆଶଙ୍କା କରିଥିଲି । ଅଞ୍ଜଳୀଙ୍କୁ ବୁଝେଇବା ପାଇଁ ନିଜକୁ ପ୍ରସ୍ତୁତ କରିନେବା ମୁହୂର୍ତ୍ତରେ ସେପଟୁ ଅଞ୍ଜଳୀ କହି ଚାଲିଥିଲେ, ‘ତୁମକୁ କିଛି ଘର କାମ ଶିଖେଇନି ବୋଲି ଗାଳି ଖାଉଛି ମୁଁ’ । ଅପ୍ରସ୍ତୁତ ଅନୁଭବ କଲି । ବୋଉଠାରୁ ମୋ’ ନିମନ୍ତେ ସମସ୍ତ ଗାଳି ମତେ ଆଶ୍ୱାସନା ହିଁ ଦେଉଥିଲା । ଏ ଲକଡ଼ାଉନ ସମୟରେ ବୋଉ ସହିତ, ବାପାଙ୍କ ସହିତ ନିଜକୁ ସହଜ କରି ମିଶିଛନ୍ତି ଅଞ୍ଜଳୀ । କୃଷ୍ଣଚୁଡା ଗଛରେ ଲଦି ହୋଇଥିବା ଫୁଲସବୁ ଅଞ୍ଜଳୀଙ୍କ ମିଠାମିଠା ସ୍ୱର ସହିତ ମିଶିଯାଇ ଏକ ଅଦ୍ଭୁତ ଅନନୁଭୁତ ଅନୁଭୂତି ରେ ପରିଣତ ହେଉଥିଲେ । କବାଟରେ କିଏ ଡାକିଲାକି ???? ଟିକେ ଚମକି ପଡି ଚାହିଁଲି ଦାଣ୍ଡ ଦୁଆର ଆଡକୁ । ଲକଡାଉନ ସମୟରେ କିଏ ବା କେମିତି ଆସି ଡାକିବ ଦୁଆରେ !!!! ପୁଣି ଖୁଡ କରି ଶବ୍ଦ ହେଲା । ଅଞ୍ଜଳୀ ଫୋନ ରଖି ଦେଲେଣି । ପବନ ପିଟି ହେଉଛି ଦାଣ୍ଡ ଦୁଆରେ । କେହି ନାହାନ୍ତି ଜାଣି ସୁଦ୍ଧା ମୁଁ ଦାଣ୍ଡ ଦୁଆର ଖୋଲି ଦେଇଥିଲି ଆଉ ଏପଟ ସେପଟ ହୋଇ ଖୋଜି ହେଉଥିଲି ଚିହ୍ନା ଜଣା ମଣିଷ ମାନଙ୍କୁ ।
****
An well crafted short story, depicting the emotions of three different generations in a typical middle class Indian family, in the prevailing circumstances. One can easily identify himself/herself with the characters of this story.
LikeLike
Thanks for your kind comments.
LikeLike
Touching story. Facing the same situation staying at home in Shutdown. Keep posting. Thank you.
LikeLike
Thanks
LikeLike
Thank you so much.
LikeLike